Farskólinn og SSNV gera með sér samning um stuðning samtakanna við námskeið fyrir bændur

Undanfarin ár hefur SSNV stutt vel við fræðslu fyrir atvinnulífið á Norðurlandi vestra.

Farskólinn og Samtök sveitarfélaga á Norðurlandi vestra (SSNV) og Farskólinn hafa gert með sér samkomulag um að SSNV verði bakhjarl námskeiða fyrir bændur sem fyrirhugað er að halda á vegum Farskólans á komandi vetri. Námskeiðin miða að því að veita bændum fræðslu um þróun, fullvinnslu og markaðssetningu afurða í takt við Beint frá býli hugmyndafræðina. Verkefnið er áhersluverkefni sóknaráætlunar Norðurlands vestra frá árinu 2017.

Um er að ræða tvenns konar námskeið. Annars vegar Matarsmiðju - Beint frá býli sem haldin verður í Húnavatnssýslum og er samskonar námskeið og haldið var í Skagafirði vorið 2018 og mæltist einkar vel fyrir. Í Matarsmiðjunni er kennt eftir vottaðri námskrá Fræðslumiðstöðvar atvinnulífsins. Hins vegar er um að ræða námskeiðsröð í fullvinnslu ýmissa afurða, svo sem úrbeiningu á kind og folaldi, hrápylsugerð, kæfugerð, heitreykingu á kjöti, ostagerð o.fl. Alls er fyrirhugað að halda 9 mismunandi námskeið sem hægt er að sækja hvert fyrir sig eða alla námskeiðsröðina.

Norðurland vestra er landbúnaðarhérað og það er mikilvægt að bændur fái stuðning við að vinna að virðisaukningu þeirrar hrávöru sem hér er framleidd. Um slíkt er fjallað í Sóknaráætlun Norðurlands vestra árin 2015-2019. Bæði þessi námskeið sem SSNV gerist nú bakhjarl fyrir uppfylla það skilyrði vel.

Halldór B. Gunnlaugsson er verkefnastjóri námskeiðanna og gert er ráð fyrir að námskeiðin hefjist í lok sláturtíðar..

Þess má geta í lokin að undanfarin ár hefur samstarf Farskólans og SSNV verið gott. SSNV styrkti meðal annars nám í svæðisleiðsögn árið 2017 og starfsmenn samtakanna hafa komið að kennslu á námskeiðun  sem tengjast ferðaþjónustu á Norðurlandi vestra. 

 

Frá vinstri: Halldór Gunnlaugsson, verkefnastjóri hjá Farskólanum, Bryndís Þráinsdóttir, framkvæmdastjóri Farskólans og Unnur Valborg Hilmarsdóttir, framkvæmdastjóri SSNV.